Бөтә донъя башҡорттары ҡоролтайының башҡарма комитетында Ата-әсәләр комитеты булдырылғайны. Ул үҙенең эшмәкәрлеген көндән-көн көсәйтә. Республика төбәктәре буйлап башҡорт ата-әсәләр комитеты онлайн - осрашыуҙар ойоштора. Ошондай мәртәбәле, ата-әсәләр өсөн әһәмиәтле осрашыу 2 февралдә Асҡын, Балтас, Бөрө, Благовещенск, Борай, Ҡариҙел, Мишкә райондарының һәм Бөрө ҡалаһының башҡорт ата-әсәләре менән уҙҙы. Уның эшендә Ҡоролтай белгесе Хабирова Миләүшә Фәйзетдин ҡыҙы, «Аҡтирмә» мәҙәни ойошма рәйесе Кузбекова Рәйсә Абдрахман ҡыҙы, республика ата-әсәләр комиссия рәйесе Эльвира Митен ҡыҙы Байназарова һәм уның урынбаҫары Айгөл Әнүәр ҡыҙы Атанова ҡатнашты. Шулай уҡ сарала республиканың билдәле шәхестәре - яҙыусы, мәғрифәтсе М. Бураҡаева, БДУ профессоры, филология фәндәре докторы Ғ.Ҡунафин ҡатнашты. Улар көнүҙәк мәсьәләләр менән сығыш яһаны.
Осрашыуҙың төп маҡсаты булып, ата-әсәләргә туған телде уҡытыуҙа балаларҙың хоҡуҡтарын, уларҙың мөмкинлектәренә таянып, телдең әһәмиәтен аңлатыу. Туған телгә һөйөү тәрбиәләүҙә, уны үҫтереүҙә, мәктәптәрҙә тейешле кимәлдә уҡытыуҙа ата-әсәләрҙең роле ҙур икәне билдәләнде. Шуға күрә лә, урындарҙа башҡорт ата-әсәләренең комитетын булдырырға ҡарар ҡабул ителде. |