2 ноябрҙә райондың туған телдәр уҡытыусыларының сираттағы ултрышы уҙҙы. Ул онлайн форматта ойошторолдо. Уҡытыусылар яңыраҡ үткәрелгән “Салауат Юлаев шиғырҙарын яттан һөйләүселәр” бәйгеһенең, “Республикамды данлайым” тип аталған район иншалар конкурстары буйынса йомғаҡ яһаны, еңеүселәр ҙә атап үтелде. Шулай уҡ район методик берләшмә рәйесе Г.Ф.Яҡупова октябрҙә билдәләнгән респулика күләмендәге башҡорт теле уҡытыусылары форумы тураһында ҡыҫҡаса мәғлүмәт биреп, унда Байҡыбаш урта мәктәбе уҡытыусыһы Ә.М.Кәбированың эшмәкәрлеге юғары билдәләнеүе тураһында бәйән итте.
Артабан Абыҙ төп дөйөм белем биреү мәктәбенең башҡорт теле уҡытыусыһы Г.Р.Солтанова сығыш яһаны. Ул бөгөн популярлаша башлаған буктрейлерҙар тураһында һөйләне, уны уҡылған китап буйынса видеояҙма-анонс, реклама, интрига икәнлеген атап, ошондай эш алымын ҡулланыу кәрәклеген һыҙыҡ өҫтөнә алды. Сөнки әлеге ваҡытта тап буктрейлерҙар менән бәйле бер-нисә республика кимәлендә конкурстар иғлан ителгән.
Шунан һуң кәңәшмәлә ҡатнашыусылар алға ҡуйылған бурыстарҙы барланы, төп эшмәкәрлектә осраған теге йәки был мәсьәләләргә бәйле фекерҙәр менән уртаҡлашты. Киләсәктә райондың туған телдәр уҡытыусыларның Интернет киңлектәрендә үҙ порталы булдырыласаҡ – шундай уй-ниәттәр ҙә яңғыраны кәңәшмәлә. |